Les mots surlignés font l'objet d'une note
1Mon seigneur, suyvant ce quil vous a pleu me commander par voz lettres patentes
2datées du XXIXe decembre dernier passé, je ay faict procès verbal
3des procedures faictes jusques à present pour la execution des lettres
4royaulx et vostres, lequel vous envoye et par yceluy porrés cognoistre
5que incontinant ayant eu le rapport des consulz des villes et lieux de
6ce ressort, je manderer reduyre à la mayn du roy les biens de
7ceulx qui me seront nommés pour absentz et fère procès
8verbal de ce que se fera par cy après et sil y a opposantz, je ferè
9procès verbal de leurs oppositions et puis vous renvoyerè le
10tout. Nous ne avons aultres nouvelles ycy dignes de
11vous escripre, que me gardera vous faire plus longue lettre et
12sera lendroict auquel vous presenterè mes humbles et très
13affectionées recommandations, priant le Createur,
14monseigneur, vous doynt en joye et santé le comble de voz très
15haultz et genereulx desirs. A votre ville du Montelhimar,
16ce XVe de janvyer 1573.
17Je vous ay adverti par mes precedentes lettres du faict de Clansayes
18et des Torrettes qui ne sont pas de nostre ressort et sont bien
19du vostre et certes nous doubtons fort les Torretes qui sont
20près du Rosne et que les rebelles tachent de surprendre
21quelques villes au bord du Rosne de par dela voir que
22lon dict quilz ont pris Beauchastel et si ont cuydé surprendre
23Privas lon doubte aussi Raynac qui est de ce ressort,
24dont vous en ay bien volu advertir à ce que votre seigneurie
25y puisse pourvoir dheure.
26Votre humble et très hobeissant
27serviteur
28Andrieu De Exea vi senechal